සති දෙකකට උඩදි ඇලබාමා ප්රාන්තයේ ටස්කලූසා කියන නගරයට ගියා සමුළුවකට සහභාගි වෙන්න. ඉතිං ඒක ඉවර වෙල ගියා වට පිටාව බලන්න. ටස්කලූසා කියන නගරයට සැතපුම් පහළොවක් පමණ දකුණින් තියෙනව රතු ඉන්දියානුවන්ගෙ එහෙම නැත්නම් ස්වදේශික ඇමරිකානුවන්ගෙ සංරක්ෂණය කරන ලද ජනාවසයක්. දැන් එහි රතු ඉන්දියානුවන් නැති උනත් ඔවුන් ගේ වාස භූමි සංරක්ෂණය කරල තියෙනවා. ඔය ටස්කලූසා වල ඉන්නව අපි දන්නා අඳුනන ලංකාවෙ මිත්රයෙක්. ඔහු තමා මේ ගමනට අනුග්රහය දැක්වුවේ. ස්වදේශික ඇමරිකානුවන්ගෙ මෙම සංරක්ෂිත වාස භූමිය තියෙන ප්රදේශයට කියන්නෙ මවුන්ඩ්විල්, ඇලබාමා කියලයි.
ඇලබාමා ප්රාන්තය තියෙන්නෙ ඇ. එ. ජ. හි දකුණට වන්නටය. උතුරින් ටෙන්නිසී ප්රාන්තයත්, නැගෙනහිරින් ජෝ’ජියා ප්රාන්තයත්, දකුණින් Gulf of Mexico යනුවෙන් හඳුන්වන කුඩා මුහුදු තීරුවකුත් ෆ්ලොරිඩා ප්රාන්තයේ කොටසකුත් පිහිටා තිබේ. ඇලබාමා ප්රාන්තයේ බටහිර මායිම වන්නේ මිසිසිපි ප්රාන්තයයි. මිසිසිපි වලට එම නම ලැබුනා සේම ඇලබාමා වලටද එම නම ලැබි ඇත්තේ රතු ඉන්දියානුවන් ගෙන්ය. ඇලබාමා යන්නෙහි තේරුම රතු ඉන්දියානු බසින් “බෙහෙත් සඳහා ගස් කපන ප්රදේශය” යන අදහස වන අතර ප්රාන්තය හරහා ගලා යන ගඟද එම නමින්ම හැඳින්වේ. ඇලබාමා ප්රාන්තයේ උතුරු කොටස ඇපලාචියන් කඳු වලට අයත් වේ. සරත් කාලයට ඇලබාමා කඳුකරය අශ්රිත පෙදෙස අතිශය චමත්කාරය. ගිය ගිම්හාන කාලයේ මා ඇපලාචියන් කඳු අතර ප්රාන්ත කිහිපයක සැරිසැරුවා. මේ ඇමරිකාවේ කාර්මික වශයෙන් දියුණු උතුරට වන්නට ඇති ප්රාන්තය. කෘෂිකාර්මික වටා පිටාවක් ඇත්තේ දකුණෙහි ය. උතුරෙහි අය දකුණෙහි අය සමච්චලයට ලක්කරන්නේ “in south, where sushi is still called bait” කියාය.
මා නරඹන්නට ගිය ස්වදේශික ඇමරිකානුවන්ගෙ සංරක්ෂිත ජනාවසය පිහිටා ඇත්තේ ගං ඉවුරක් ඇශ්රිතව වන අතර අක්කර 320ක භූමි භාගයක් අයත් වෙනවා. මෙය මා මින් පෙර දැක ඇති රතු ඉන්දියානුවන් ගේ සංරක්ෂිත ජනාවස වලට වඩා විශේෂත්වයක් උසුලයි. මෙම ස්වදේශිකයන් ඔවුන්ගේ නිවාස තනා ඇත්තේ සමතලා බිමක ඔවුන් විසින් කෘත්රිමව තනා ගන්නා ලද කුඩා කඳු ගැට වලය. මෙහි එවන් කඳු ගැට 26ක් පමණ තිබේ. ස්ථායට ඇතුළුවන තැන ඇති විස්තරයේ සඳහන් පරිදි මෙම කුඩා කදු ගැට රතු ඉන්දියානුවන් විසින්ම ගං ඉවුරෙන් මැටි හා ගල් බොරළු ගෙනවිත් අතින්ම සෑදූ ඒවාය. මෙම ස්වදේශික රතු ඉන්දියානුවන් පසු කාලීනව ඔවුන්ගේ මෙම වාස භූමි වලින් නෙරපනු ලැබුවා.
බොහොම මහන්සි වෙලා වැඩ කරන අතරෙ කෝපි එකක් බොන්න ඕන කියල ‘Starbucks’ එකට ගියා. එහි නා නා මාදිලියේ කෝපි වර්ග තියෙනවා. මම වඩාත් කැමති ‘Café Latté’ කියන කෝපි එකට. ස්ටා’බක්ස් එකේ කෝපි දාලා දෙන්නෙ අපූරුවට හදපු කඩදහි කෝප්පයක. ප්ලාස්ටික් හෝ රිජීෆෝම් කෝප්ප වල එහෙම නං නෙමේ. ඉඳල හිටල ස්ටා’බක්ස් එකෙන් කෝපි එකක් බිව්වට අර කඩදහි වලින් හදපු කෝපි කෝප්පය ගැන වැඩි සැලකිල්ලක් දැක්වුවෙ නෑ. අද මට හිතුන කෝප්පයෙ මොනාද තියෙන්නෙ කියල බලන්න. එහි අපූරු අදහසක් මුද්රණය කරල තිබුනා. ‘The Way I See It’ කියල ලියල තිබ්බ එය 280 වැනි අදහස. මම හිතන්නෙ එක එක කෝප්ප වල වෙනස් දෑ තමයි මුද්රණය කරල තියෙන්නෙ. ජෝන් මෝ (John Moe) කියන ගත් කතුවරයෙක්ගෙ තමා මෙම අදහස. ආයෙ දවසක කෝපි එකක් බ්ව්වාම කියන්නංකො ඒකෙ ලියලා තිබ්බෙ මොනවද කියල.
