තත්‍යානා සහ අමතකව ගිය කවිය මැයෙන් බෝදිනී සටහනක් ලියල තිබ්බ ඇගෙ “කවියට පෙම් බැඳ” නම් වියුණෙ. එයට මා එකතු කළ අදහස තවත් නිරවුල්ව ලියන්න ඕන කියල තමයි මේ සටහන කැටපත් පවුරට එක්වන්නෙ.

තිබ්බතීය මළ පොත ගැන ඔබ අසා ඇත්ද? ලංකාවෙ සිටිනා කාලය තුල මම එය කියවුයෙමි. ඇගේ නිසඳැසට පළමු ගද්‍ය පද වැල කියවන විට මට සිතට දැනුනේ තිබ්බතීය මළ පොතෙහි සදහන් දෑය. “මම මරණය කරා යමි. මා දන්නා පරිදි එය නිසැකවම මා අසල ඇත. වරෙක එය මගේ ඇඟිළි තුඩු වලට දැනේ, වරෙක එය මගේ එය ‍මගේ ඇට මිදුළු වලට දැනේ, වරෙක එය මගේ සිත සමග සක්මන් කරයි. වරෙක දුරිනුත් වරෙක ළඟිනුත් සිට එය මා සමග මගේ ගමන යයි.” සේකර නොමියෙමි හා පුබුද්ධ කාව්‍යනට ඇසුරු කර ගත්තේ එයයි. සේකරට මරණී රමණී විය. “සුදු පාවඩ මත, දවුල් තම්මැට්ටම් පෙරටු කොට ගෙන, නෑ සියන් මිතුරන් පිරිවරා ගෙන, සිව් දෙනෙකුගෙ කර මත හැමට උඩින් සිටිනා විට මරණය ජයග්‍රහණය කැයි මට සිතේ”. සේකර තව තැනක කියනව

“ඔබ මට සිහි වෙයි
දහසක් ගිලනුන් මිය ගිය මේ ඇඳ මත
නිසලව වැතිරී මම
ඔබ ගැන සිත සිතා ඉඳිමි

මෙය මැදියම් රැය විය හැක
විශ්වය නිශ්ශබ්දය
එකී නිහඬතාවය මැද
ගන නිල් කරුවල තුළ
යාන්තමින් කනට ඇසෙයි
කඳු මුදුනින් බැස ගෙන
මිටියාවත දිගේ ගලන
ඔබේ මිහිරි ගී රාවය

කවදාවත් නැති තරමට
මට ඔබ ආසන්නය
නිදිබර සුසුම් රොදක්
රහසක් මා කනට කියයි
සියුමාලි ඇඟිලි තුඩක්
මා ඇසි පිය සෙමෙන් සිඹියි

ඉවකින් මෙන් මට වැටහෙයි
උණුසුම් සුළඟක් සේ
පර මල් සුවඳක් සේ
ඔබ මා වට පිරී සිටියි

දැන් මට තනියක් නැත
නොගැයූ ගීතයක තනුවක් වී
නොහෙලූ කඳුළක සිහිලක් වී
නොපැතූ පැතුමක කළලක් වී
නොපෙනී ඔබ මා සමග සිටී

සැහැල්ලු සිත බරක් නොමැතිය
අනන්ත අපරිමාණ විශ්වය තුළ
සෙමෙන් සෙමෙන් විසිරී යන
පුළුන් වලා රොදක්මි මම
අනන්ත අපරිමාණ විශ්වය තුළ
ඔබත් මාත් දෙදෙනා හැර
වෙන අන් කිසිවෙක් නැත

සියළු දුක් අවසානයේ
සියළු සැප අවසානයේ
ජීවිතේ එක් වරක් පමණක් විඳින
පරමානන්දයකි මෙය”.

නොමියෙමි හි සේකර මරණය ගැන ඉතා සියුම්ව ස්පර්ශ කර ඇත. නිතර මරණය සමග සිටින අප සොඳුරු කවක් සේ එය ගැන සිතීමට හැකි නම් කොපමණ අගේද? සේකර සියළු දෙ හරසුන් ය, අසාර ය, අස්ථිර ය කියා ලොප් වී නැත. අපට ඉගෙන ගත හැකි දෑ බොහෝයි. කවිය කවි කම තුලම කවි කල යුතුය.

“මළ හිරු බසිනා සැන්ඳෑ යාමේ – ඔබ‍ ගෙන් සමු ගන්නම්
අඳුරට ඉඩදී අඳුරේ සැඟවී – ඔබ ගෙන් වෙන් වී මම යන්නම්

සුළ‍ටඟේ දැවටී ඔබට හොරෙන් – මම ඔබ වෙත එන්නම්
සියුමැළි දෑතින් ඔබ හිස අත ගා – ඔබ නිදි කරවා මම යන්නම්

අළුයම පිබිදෙන ඔබගේ දෑසේ – මල් පෙති අග පිණි කඳුලකි රඳවා
සුසුමක් වාගේ ඉන් පිටවී – ඔබ ගෙන් වෙන් වී මම යන්නම්”

කඨෝර වූ යථාර්ථය ලියූවත් එහි සොඳුරු බව බිඳකුදු නොඅඩුව සේකරගෙ පන්හිදෙන් වැහුනා. නොමියෙමි ත්, ප්‍රබුද්ධත් එයට සාක්ෂි දරයි. අසාර බව අවබෝධ වූ නිසා ඔහු සිතිවිලි වලට නැවතීමේ සිත තැබුවේ නැත.

“පරවුණු මල් සුවඳ අතීතේ
පරසතු මල් ලඟ විසිර ගියාවේ
දුවගේ මුවින් එන කැකුළු සිනාවේ
එළිය මැදින් හෙ‍ට දවස උදාවේ”

(උපුටා ගැනීම් වල යම් දොසක් ඇතොත් කමන්න, අද මා ළඟ සේකරත්, මළ පොතත් නැත)

“මේ කරන සියල්ලෙහි හරසුන් බවක් දැනෙනවා, යම් දිනෙක, මේ සියලු දේත් නවතිනවා, එතෙක් අපි මේ කරන්නේ කුමක්ද? මේ මගේ සිතුවිලි කුමටද?” බෝදිනී තැබු සටහනට මම යමක් එක් කරන්න කැමතී. මතක තියාගන්න සේකරට මරණී රමණී වූ බව. දෛවයේ සරදමක් දෝ ඔහු ‍මිය යන්නට පළමු දා රාත්‍රියෙහි කියවා ඇත්තේ තිබ්බතීය මළ පොතයි. නෙමියෙමි හි සියල්ලේ හරය දකින අතර ප්‍රබුද්ධ හි ඔහු ‍ඒ සියල්ල ඉක්මවා යයි. “වරෙක දුරිනුත් වරෙක ළඟිනුත් සිට මරණය මා සමග මගේ ගමන යයි”. මා වරෙක ලියු නිසඳසක් මට මතකයි. එය දළ අදහස මෙයයි. “මා පෘථිවියෙන් පිටත අවකාශයට යයි. මට ඉතා විසිතුරු චමත්කාර දර්ශණයක් දක්නට ලැබේ. සහසක් තරු වැල්, මණ්දාකිණි වලින් සමන්විත ඒ දසුණ මන බදී. මම මා ළඟම සිට ඈත අවකාශයේ තරුවක් ඉපිද දැල්වී නිවී යන අයුරු (මියෙන අයුරු) නැරඹුවෙමි. අස්ථිර, අසාර වූ දෙයකින් ‍සුන්දරත්වයක් සොඳුර බවක් දැකිය හැකිනම් එය තුල කවි කම උපදී”.

ජීවිතය තරමටම අස්ථිර
මරණය තරමටම ස්ථිර
තවත් මොනවාද ඉතිරි
“අද”
ඇයි මතකය
ඔව්! ඇත්තමයි,
සේපාලිකා මල් ගොලේ
අදත් මල් පිපිල.

©සහන්

Firefox 3 Download Day is coming…

Let’s set a new Guinness World Record!

ෆය’ෆොක්ස් 3 ඉතාම ළඟඳි උණු උණු‍ම නිකුත් කරන්නයි යන්නෙ. මොසිල්ලා මෘදුකාංග ලෝලීන්ගෙ ආසාවක් තියෙනව ෆය’ෆොක්ස් 3 දියත් කරන දිනයෙදී පැය 24ක් ඇතුලත එය ලොව වැඩිම ප්‍රමාණයක් බාගත කර ගත් මෘදුකාංගය බවට පත්කරන්න. මෙම වියුණු යොත (web address) ඔස්සේ ඔබට වැඩි විස්තර ලබා ගන්නට පුළුවන්. ෆය’ෆොක්ස් 3 සිංහල වලට දක්වන සහාය උපරිම වන අතර තවත් මන බඳන අංග වලින් හෙබියි.

සති දෙකකට උඩදි ඇලබාමා ප්‍රාන්තයේ ටස්කලූසා කියන නගරයට ගියා සමුළුවකට සහභාගි වෙන්න. ඉතිං ඒක ඉවර වෙල ගියා වට පිටාව බලන්න. ටස්කලූසා කියන නගරයට සැතපුම් පහළොවක් පමණ දකුණින් තියෙනව රතු ඉන්දියානුවන්ගෙ එහෙම නැත්නම් ස්වදේශික ඇමරිකානුවන්ගෙ සංරක්ෂණය කරන ලද ජනාවසයක්. දැන් එහි රතු ඉන්දියානුවන් නැති උනත් ඔවුන් ගේ වාස භූමි සංරක්ෂණය කරල තියෙනවා. ඔය ටස්කලූසා වල ඉන්නව අපි දන්නා අඳුනන ලංකාවෙ මිත්‍රයෙක්. ඔහු තමා මේ ගමනට අනුග්‍රහය දැක්වුවේ. ස්වදේශික ඇමරිකානුවන්ගෙ මෙම සංරක්ෂිත වාස භූමිය තියෙන ප්‍රදේශයට කියන්නෙ මවුන්ඩ්විල්, ඇලබාමා කියලයි.

ඇලබාමා ප්‍රාන්තය තියෙන්නෙ ඇ. එ. ජ. හි දකුණට වන්නටය. උතුරින් ටෙන්නිසී ප්‍රාන්තයත්, නැගෙනහිරින් ‍ජෝ’ජියා ප්‍රාන්තයත්, දකුණින් Gulf of Mexico යනුවෙන් හඳුන්වන කුඩා මුහුදු තීරුවකුත් ‍ෆ්ලොරිඩා ප්‍රාන්තයේ කොටසකුත් පිහිටා තිබේ. ඇලබාමා ප්‍රාන්තයේ බටහිර මායිම වන්නේ මිසිසිපි ප්‍රාන්තයයි. මිසිසිපි වලට එම නම ලැබුනා සේම ඇලබාමා වලටද එම නම ලැබි ඇත්තේ රතු ඉන්දියානුවන් ගෙන්ය. ඇලබාමා යන්නෙහි තේරුම රතු ඉන්දියානු බසින් “බෙහෙත් සඳහා ගස් කපන ප්‍රදේශය” යන අදහස වන අතර ප්‍රාන්තය හරහා ගලා යන ගඟද එම නමින්ම හැඳින්වේ. ඇලබාමා ප්‍රාන්තයේ උතුරු කොටස ඇපලාචියන් කඳු වලට අයත් වේ. සරත් කාලයට ඇලබාමා කඳුකරය අශ්‍රිත පෙදෙස අතිශය චමත්කාරය. ගිය ගිම්හාන කාලයේ මා ඇපලාචියන් කඳු අතර ප්‍රාන්ත කිහිපයක සැරිසැරුවා. මේ ඇමරිකාවේ කාර්මික වශයෙන් දියුණු උතුරට වන්නට ඇති ප්‍රාන්තය. කෘෂිකාර්මික වටා පිටාවක් ඇත්තේ දකුණෙහි ය. උතුරෙහි අය දකුණෙහි අය සමච්චලයට ලක්කරන්නේ “in south, where sushi is still called bait” කියාය.

මා නරඹන්නට ගිය ස්වදේශික ඇමරිකානුවන්ගෙ සංරක්ෂිත ජනාවසය පිහිටා ඇත්තේ ගං ඉවුරක් ඇශ්‍රිතව වන අතර අක්කර 320ක භූමි භාගයක් අයත් වෙනවා. මෙය මා මින් පෙර දැක ඇති රතු ඉන්දියානුවන් ගේ සංරක්ෂිත ජනාවස වලට වඩා විශේෂත්වයක් උසුලයි. මෙම ස්වදේශිකයන් ඔවුන්ගේ නිවාස තනා ඇත්තේ සමතලා බිමක ඔවුන් විසින් කෘත්‍රිමව තනා ගන්නා ලද කුඩා කඳු ගැට වලය. මෙහි එවන් කඳු ගැට 26ක් පමණ තිබේ. ස්ථායට ඇතුළුවන තැන ඇති විස්තරයේ සඳහන් පරිදි මෙම කුඩා කදු ගැට රතු ඉන්දියානුවන් විසින්ම ගං ඉවුරෙන් මැටි හා ගල් බොරළු ගෙනවිත් අතින්ම සෑදූ ඒවාය. මෙම ස්වදේශික රතු ඉන්දියානුවන් පසු කාලීනව ඔවුන්ගේ මෙම වාස භූමි වලින් නෙරපනු ලැබුවා.

හත්වලාමයි කිව්වලු. පොඩ් අත්හදා බැලීමක් කරන්න ගිහිල්ලා MySQL දත්තපාදය නැති වෙලා ගියා. දන්න දේ සියල්ලම කරල බැලුව හරි ගියේ නෑ. නැවත ව’ඩ්ප්‍රෙස් බාගත කරල ස්ථාපනය කරන්න බැලුව හරි යන්නෙම නෑ. sahan.helasara.com වලට හරියට ස්ථාපනය කරන්නත් බෑ. මොනව කරන්නද ‍නැවත මුල සිට වියුණ විව්වා අළුත් තැනක. පරණ සටහන් නැවත ඒ තැන් වලම ස්ථාපනය කරා. අළුත් තැන තමා ketapath.helasara.com . මෙය ගොල්ලොත් මෙය එකතු කරගන්න.